السلام عليكم ورحمه الله
وحشتوني مررره مررره مرره والبوست دا رداً لطلب العروسه الجميله الي طلبتني
اتتكلم عن دي الفتره الي بين الشوفه وبين الملكة ..
اول شي بعدالشوفه
طبعا في شوفه بيصير تلاقي الارواح وفيها نحس بالقبول والرفض الي ربنا يوحي قلوبنا فيها
اشوف بنات كتير يجيهم احساس انو الزواج فرصه بس مارتاحت لرجال تحس بنفور
بشي مو حلو كثير بيكون اتجاه الانسان ده مو خوف من الموضوع وكدا لا
نفور لشخصيه ..وتمشي الموضوع وبعدين يوقع الفاس براس
المهم ماعلينا مو موضوعنا بس دي نقطه مره معصبتنيي انو بنات كتيير ميتين ع زواج
ويرضو باي شي وشي مومقتنعين فيه ويرضو يعيشو بذل وقهر ولا ترضى تعيش
معززه مكرمه عند اهلها
المهم نجي لدي الفتره الي هي بين الشوفه والفرح طبعا بدي الفتره بالعاده يتحدد فيها كل شي
حتي مبلغ المهر حتكون عارفتو وين حتعيش وكل شي
١-اول شي واهم شي استخيري واستخيري بدي الفتره وادعي الله يتمم عليكم ويكتبلك الخير
٢- اتصدقي بنيه انو لو كان خير يتمم عليكي لو شر يصرفو عنك
٣-لو ولي امرك تحسي انو ممكن يرضي تكلمي خطيبك قبل الملكه عشان تتعرفو على بعض
منجد يابنات دي نقطه مره مهمه يعني انت الي تحددي يتمادى معاك بالكلام او لا
اتكلمي معا بحدود وقت محدد بمواضيع محدده تتعرفي عليه جيبي نوت واكتبي
الاسئله الي نفسك تعرفيها عنو بورقه زي المقابله شخصيه يعني منجد كدا بتقطعي
شوووط كبيير وتطمني وتعرفي تفكير الانسان الي حتعيشي معا لان حتعيشي معا
كل الباقي من عمرك وكمان عشان ماتنصدمي فيلو بعدين ولاهو ينصدم فيكي
اسمعو كلام ا.طارق الحبيب بدا الموضوع خلي ولي امرك يسمع للمقطع انا الحمدالله
كنت اكلمو ايام المسنجر لان مارضيت اكلمو تلفون استحيت مره :p
هون عليا كتيييير عن تجربه
٤- ابدئي اقرئي عن الزواج وتثقفي لاتقعدي تقدي تجارب عالم حواء وعرايس
لان صراحه كلام المنتديات مرره عباره عن تجارب شخصيه وبعضها مملح ومبهر مره
وبعضو كدب وبعضو مو صح والقليل الي صح ومايفيد اتفرجي فيديو لطارق الحبيب
وفي ناس تانيه كثير ان شاءالله ببوست حنزلهم
٥- النقطه دي حابه اذكرك فيها الزواج مو كل شي ازا ماتم الموضوع ماهي نهايه الدنيا
انو اعيش بكرامتي افضل ماعيش مع واحد يكرهني فيلو وبحياتي معا ومو مشكله لو ماتزوجتي
وعمرك ٢٤ الزواج نصيب ممكن يجي وعمرك ٤٠ وتخلفي وتعيشي حياه كريمه سعيده
اهم شي تكوني مقتنعه بالانسان ١٠٠% ويكون بينكم دا شي الي ربنا ينزلو على قلوبكم
شعور غريب وحش وحلو :S حااجه كمان لاترضي باي احد يدق بابكم لاتسئلو اقل سؤآل
اسئلو كويس وطططقسوو عنو كوييس لو حسيتي شي واحد وادعي ربنا دايما يدلك على الصح
٦- نبدء كمان لو ماجاكي المهر بس تعرفي كم ابدئي خططي وسوي جدول ايش بتجييبي
ايش بتشتري ايش بتحتاجي سوي نوت اكتبي فيها كل طلبات الجهاز من الالف للياء شوفي
ايش عندك وتقدري تاخدي معاك
٧- لو بتسوي شبكه حددي كل شي وابدئي خططي الثيم الالوان الضيافه ايش تبغي ابدئي حطي كدا
صوره تخيلييه لشكلك وديكور حفلتك
٨- هنا ابدئي شوفي انت ايش تبغي تحسني بشكلك حابه تنحفي تسمني .. حابه تفتحي ولا تسمري :p
تبغي تسوي ليزر .. اهتمي بصحة شعرك وبرضو مو اي خلطه بالنت تاخديها وتسويها
واهم شي المداومه حتكلم برضو بوست عن العنايه وكدا ولو تبغي تسوي ليزر سوي جدول عنايه بسيط
بنات الاسنان .. الاسنان لو عندك مشكله باسنانك لو في ريحه من فمك روحي عالجيها ... لو عندكم مشاكل تعرق
برضو روحو طبيب جلديه بيديكي ابره وحده بوحده :)
بنسبالي انا ماسويت شي غير اليزر و جلسه تنظيف بشره وحمام مغربي ودلكه قبل الفرح بكم يوم :D
الخلطات ماسويت شي مع انو كان عندي سنه من شوفه للفرح بس كسل ياساتر
١٠- واخر حااجه ضروريه لاتسمعي نصايح من احد او تجربه من احد لان كل وحده لها تجربه مختلفه
وبقولك معلومه الشخصيه زي البصمه مو كل الناس تتشابه بشخصيه طب تقولي العصبيه مثلا
بس كل واحد عصبيتو مختلفه عن تاني يعني ممكن يهدي بطريقه معينه بيعصبو شي معين مثال بسيط
في رجال بيكون ثور هايج اي شي يعصبو ويثوور ويكسر كل شي قداااااااامو ويزعق ويقول كلام
مره ماينقال بس يخرج من المكان لدقيقه بعدين يرجع ولكانو صار شي دا المثال متواجد خالي كده
وحنون جداً بس مره عصبييي ويخوف من عصبيتو اخاف اتكلم معا او اقول شي ممكن يشوفو غلط
بس مره حنون ومره طيب ويعصب ويرجع هاديء وكانو ماصار شي
في نوع تاني من رجال عصبي مره ويخاصم كدا بصوت عالي ويهدد بس مايرضي من حالو لازم
تذلي نفسك عشانو لازم تعرفي مفاتيح شخصيتو كيف
في الرجال الي تشوفي بارد ومايعصب ومستحيل يرفع صوتو او يغلط عليكي بسس لازعل
ممكن يطنشك شهر مايسأل عنك لين ماتعتذري حتى لو ماغلطي
وكل نوع من دي الانواع تتشعب كمان ومو كل طررريقه تنفع مع وحده راح تنفع معاك
راح تتعلمي مع العشره والايام هو حيعللمك كيف
ودا الي عندي ويارب اكون غطيت كل شي وفهمتو عليا وان شاء الله تستفيدو
احوبكم عرايس
